Back to Front Page


Share This Article!
Share
በቲም ለማ እና በህወሓት መካከል ያለው ውጥረት ሊረግብ ይገባዋል!

 

በቲም ለማ እና በህወሓት መካከል ያለው ውጥረት ሊረግብ ይገባዋል!

ከዶ/ር ዐብይ እና ዶ/ር ለማ የአሜሪካ ጉዞ ትዝብት በመነሳት

መርስ ኤ ኪዳን

ከሜኔሶታ ሃገረ አሜሪካ

08-04-18

mersea.kidan@gmail.com

 

ከሃምሌ 21 2010 እስከ ሃምሌ 23፣ 2010 ዓ.ም. ክቡር ዶ/ር ዐብይ አሕመድ እና ክቡር ዶ/ር ለማ መገርሣ በሰሜን አሜሪካ ሶስት ግዛቶች ባደረጓቸው ስብሰባዎች ዙሪያ ከብዙ ወገን ብዙ እየተባለ ነው። እኔም በሜኔሶታ የተደረጉት ስብሰባዎች አዘጋጅ ኮሚቴ አባላት ከሆኑት አንዱ በመሆኔ በሂደቱ የታዘብኳቸው አንዳንድ ነገሮች ላይ አስተያየት መስጠት አስፈላጊ ሆኖ አግኝቸዋለሁ።

በቅድሚያ ክቡር ዶር ዐብይ አሕመድ በአገራችን ጥላቻ፣ ጥርጣሬ፣ መናናቅ ተወግደው ሰላም፣ ፍቅር እና አንድነት እንዲሰፍንጥረት እያደረጉ ያሉ፤በኢትዮጵያ ህዝብ እና በወንድማችን በኤርትራ ህዝብ መካከል ሰፍኖ የቆየውን ግንብ አፍርሰው የፍቅር ድልድይ የሰሩ፣በታላላቆቹ የኦርቶዶክስ ተዋህዶ ቤተክርስቲያን እና የእስልምና እምነት አባቶች መካከል ያለውን ልዩነት በሰላም እየፈቱ ያሉ፣ በተለያዩ ኣገራት በእስር ቤቶች እየተሰቃዩ ያሉ ኢትዮጵያውያን ወገኖቻችንን እያስፈቱ ወዳገራቸው እየመለሱ ያሉ ታላቅ መሪ በመሆናቸው ክቡር ዶ/ር ለማ መገርሣ ደግሞ የዚህ የለውጥ ሂደት ፈር ቀዳጅ በመሆናቸው ለሁለቱም መሪዎቻችን የተደረገላቸው አቀባበል እና ፍቅር ተገቢ መሆኑን ለመጥቀስ እወዳለሁ።

በሜኔሶታ የአዘጋጅ ኮሚቴው ፈተና።

ሜኔሶታ እስከ ሃምሳ ሺህ የሚገመቱ ኢትዮጵያውያን የሚኖሩባት የአሜሪካ ግዛት ናት። ከነሱም እጅግ የሚበዙቱ የኦሮሞ ብሄር አባላት በመሆናቸው ትንሿ ኦሮሚያ በመባል ትታወቃለች። የሜኔሶታ ኦሮሞ ማህበረሰብ በብዛት ብቻ ሳይሆን በአደረጃጀትም ከሌሎች የኢትዮጵያ ማህበርሰቦች እጅግ የላቀ ነው። የሜኔሶታ የኦሮሞ ማሕበረሰብ ይህ የዶ/ር ዐብይ ጉዞ ከመታሰቡ በፊት የኦሮሚያ ብሄራዊ ክልላዊ መንግስት ርእሰ መስተዳድርን ክቡር ዶ/ር ለማ መገርሣን ጋብዞ ከፍተኛ አቀባበል ለማድረግ ኮሚቴዎች አዋቅሮ ዝግጅት በማድረግ ላይ እያለ ነው የ ክቡር ዶር አብይ መምጣትን ዜና ከኤምባሲው የሰማው። ኤምባሲው የኦሮሞ ማሕበረሰብን ብቻ ሳይሆን ሁሉንም በሜኔሶታ የሚኖሩ ኢትዮጵያውያን አደረጃጀቶች በመጋበዝ መሪዎቹን ለመቀበል በጋራ እንዲሰሩ ነው የጠየቀው። ሆኖም የኦሮሞ ማሕበረሰብ አስቀድሞ ዶር ለማ መገርሳን ለመቀበል ኮሚቴዎች አዋቅሮ ቆይቶ ስለነበር ሌሎቻችን በነዚያው ኮሚቴዎች ታቅፈን እንድንሰራ በጋራ ወሰንን።

Videos From Around The World

አዘጋጅ ኮሚቴው ሁሉንም ማህበረሰቦች ማቀፉ የሁላችንንም ደስታ የፈጠረ ቢሆንም፣ ለብዙ አመታት በጠላትነት ስንተያይ የነበርን በመሆናችን ብዙ ስራዎች ላይ መተማመን እንዳይኖር እና ነገሮችን ሁሉ በጥርጣሬ የማየት አዝማሚያ ፈጥሯል።ስለሆነም በመካከላችን የነበረው የመረጃ ልውውጥ እና አሰራር ግልፅነት የጎደለውእንዲሆን አድርጓል። በዚህ ሂደት የተሳተፍን አብዛኞቹ የኮሚቴ አባላት የተረዳነው አንድ ቁምነገር ቢኖር ሁላችንንም የሚያቅፍ አንድ ጠንካራ የኢትዮጵያውያን ማሕበር አለመኖር አሰራራችን እጅግ ደካማ እንዲሆን አድርጎታል። በብሄራዊ ማንነታቸው ራሳቸውን ማደራጀት የማይፈልጉ ብዙ ኢትዮጵያውያንንም በተገቢው መልኩ እንዳናሳትፍ አድርጓል። ስለሆነም መላው በሜኔሶታ የምንኖር ኢትዮጵያውያን አንድ ጠንካራ የኢትዮጵያ ማሕበር የመፍጠሩን ነገር በርትተን ልንሰራበት ይገባል። እንደዚህ ቀደሙ አንድን አመለካከት የሚወክል ሳይሆን ለሁሉም ኢትዮጵያዊ የሚመች ማሕበር ማቋቋም አስፈላጊ ነው።

በዚህ ሂደት የነበረው መጠራጠር፣ መደባበቅ እና አለመተማመን እንደተጠበቀ ሆኖ፣ በአንፃሩ ደግሞ እንዲህ ለብዙ አመታት አይን ለአይን መተያየት የማይፈልጉ ሰዎችን ሳይወዱ በግዳቸው ሰላምታ እንዲለዋወጡና አብረው እንዲሰሩ አድርጓቸዋል። በመካከላችን የነበረው መከባበርና መቻቻልም እጅግ የሚያስመሰግን ነው። በእኔ እምነት የ እነ ዶ/ር ዐብይ ጉዞ ዋና መልእክት የሆነው ግድግዳው ይፍረስ ድልድዩ ይገንባ የሚለው ዓላማ በዚህ ሂደት ግቡን መምታት ጀምሯል። በመካከላችን ከፍተኛ የጥላቻ ግንብ የነበረን የኦሮሞ፣ የአማራ፣ የሶማሌ፣ የትግራይ፣ እና የተለያዩ በኢትዮጵያዊነት የተደራጁ ማሕበሮች (ለሶስት የተከፈሉትን የኢትዮጵያ ኦርቶዶክስ ቤተክርስቲያናት ሳይቀር) በአንድ ላይ ተሰባስበን በኢትዮጵያዊነት ድልድይ እንድንሰራ መንገድ የከፈተ ሂደት ነው።፡ይህ እጅግ በጎ ገፅታው ነው።

የታርጌት ሴንተር ዝግጅት

በሚኒያፖሊስ ታርጌት ሴንተር በመባል በሚታወቀው ስቴዲየም የተደረገውን ዝግጅት ስንመለከት አንዳንድ ብስለት የጎደላቸው ሰዎች የራሳቸውን ባህል፣ ባንዲራና ሙዚቃ ብቻ እንዲጎላና የሌላው ኢትዮጵያዊ ባህል፣ ባንዴራና ሙዚቃ እንዳይጎላ ጥረት ሲያደርጉ ተስተውሏል። በዚህም ብዙ ሰዎች ቅር ተሰኝተዋል። ሆኖም ሁለቱ መሪዎች በተለይም ዶር ለማ መገርሣ ይህንየእኔ ብሄር ብቻ ጎልቶ ይታይ የሚል አስተሳሰብ የሚያርም ግሩም ንግግር አድርገዋል። በተለይ በባንዲራ ጉዳይ ያለው ልዩነት በሜኔሶታ እጅግ ጎልቶ ታይቷል። በባንዴራ ጉዳይ የሚንፀባረቁት አመለካከቶች አሳሳቢ የሚያደርጋቸው ነገር ቢኖር አንዱን ባንዲራ የሚደግፉ ሰዎች ሌሎቹ ባንዲራዎች ላይ የሚያሳዩት የከረረ ጥላቻ ነው። በዚህ ጉዳይ የማህበረሰብ ልሂቃን ብዙ ስራ ይጠበቅብናል። እኛ ማተኮር ያለብን የባንዴራዎቹ ቀለሞች ላይ ሳይሆን በአገራችን የሚሰፍነው ስርዓትላይ ነው። ኮከብ ያለው ባንዲራ ሆኖ የብሄር መብት ላይከበር ይችላል የኮከቡ መኖር የብሄር መብት መኖርን አያረጋግጥም። በተመሳሳይ መልኩ ልሙጡ ባንዲራ ሆኖ የኢትዮጵያ አንድነት አደጋ ውስጥ ሊወድቅ ይችላል፣ የባንዴራው ልሙጥ መሆን አንድነትን አያረጋግጥም። የብሄር መብትም ሆነ የኢትዮጵያ አንድነት የሚከበሩት አንዳችን ሌላውን ለማክበር ስንፈቅድ ነው። በመካከላችን መከባበር ካለ የባንዴራው ጉዳይ ብዙም አሳሳቢ አይሆንም።

ክቡር ዶ/ር ዐብይ አሕመድ ከህወሓት ጋር የገቡበትን መቃቃር ግልፅ ካደረጉበት መንገድ አንዱ በታርጌት ሴንተር ያደረጉት ንግግራቸው አንዱ ነው። በዚህ ንግግራቸው ላይ ቲም ለማ ከኦህዴድ ዶር/ ለማን እሳቸውን ራሳቸውን፣ ከብአዴን ደመቀ መኮንንን እና ገዱ አንዳርጋቸውን፣ ከደኢህዴግ ሙፈሪሃት ካሚልን እንደሚያካትት ጠቅሰው ህወሓትን ዘለውታል። በርግጥ ህወሓት ውስጥ ከዶር ዐብይ ጋር ለመስራት የሚፈልጉ የለውጥ ሃይሎች ሳይኖሩ ቀርተው ከሆነ እጅግ አሳሳቢ ጉዳይ ነው።

የእራት ግብዣ፡ ጥያቄና መልስ

በእራት ግብዣው ላይ ዋነኛው አትኩሮት የጥያቄና መልስ ሂደቱ ነበር። በአዳራሹ የተገኘው ከአንድ ሺህ በላይ ሰው በሙሉ ለዶ/ር ዐብይ ጥያቄና መልእክት ነበረው። ስለሆነም ጊዜው ማስተናገድ ከሚችለው በላይ የጠያቂ ብዛት ተሰልፎ ነበር። ከተነሱት ጥያቂዎች መሃል ብዙ አትኩሮት የሳበው በእህታችን በልልይቲ እና በእኔ ለተነሱት ጥያቄዎች ጠቅላይ ሚኒስትሩ የሰጧቸው ምላሾች ናቸው። እኔ ብዙ ጥያቄዎች ቢኖሩኝም በሜኔሶታ የትግራይ ማሕበረሰብን ወክዬ ስለተገኘሁ ያነሳኋቸው ጥያቄዎችም ያን ማሕበረሰብ የተመለከቱ ነበሩ። ዶር ዐብይ ለኛ ጥያቄዎች ከመለሷቸው መልሶችም ሆነ ከንግግራቸው እንዲሁም በኤርፖርት ስንቀበላቸው ከሰጡኝ አስተያየት ልረዳ የቻልኩት ጠቅላይ ሚኒስትራችን ክሕወሓት አመራሮች ጋር ከፍተኛ እልህ ውስጥ መግባታቸውን ነው። ይህ ከህወሓት አመራሮች ጋር የገቡበት እልህ ደግሞ ማንኛውንም ከትግራይ የሚመጣ ጥያቄን ሲመልሱ ስሜታዊ እንዲሆኑ አድርጓቸዋል። በእህቴ በልልይቲ ለተነሱትጥያቄዎችም በቀጥታ መልስ ከመስጠት ይልቅ ለህወሓት ሰዎች መልእክት ማስተላለፉን መርጠዋል። ከእኔ የተነሱትን ጥያቄዎች በቅንነት የተነሱ መሆናቸውን ከገለፁ በኋላ ጥያቄዎቹን በቀጥታ ከመመለስ ይልቅ ለሕወሓት ሰዎች መልእክት ማስተላለፉን መርጠዋል። እኔ ያነሳኋቸው የተራው ህዝብ ጥያቄዎችንም ሳይመልሱ አልፈዋቸዋል። እዚያው ደግሞ ጥያቄዬን በሌላ ተርጉመው ስለመለሱልኝ ይቅርታ ጠይቀውኛል። ብዙ የትግራይ ማሕበረሰብ ኣባላት ዶር ዐብይ የያዘውን የፍቅር እና የአንድነት አላማ ደግፈው በቦታው ተገኝተው የነበሩ ሲሆን፤ ለእኔና ለልልይቲ የመለሱት መልስ ግን እሳቸው ከሚሰብኩት የፍቅር የአንድነት እና የመቻቻል አላማ ጋር የማይሄድ ሆኖባቸው ግራ ተጋብተዋል።

በቲም ለማ እና በህወሓት መካከል ውጥረት

ዶ/ር ዐብይን ያክል ፍቅርን እና መቻቻልን የሚሰብክ ሰው እንዲህ እልህ ተጋብቶ ስመለከት የነገሩን ከባድነት ያሳየኛል። ስለሆነም ሁላችንም አገር ወዳድ ኢትዮጵያውያን ይህ በቲም ለማ እና በህወሓት መካከል ያለው ውጥረት ተፈትቶ ህወሓትም ቲም ለማን የሚቀላቀልበትን (የሚደመርበትን) መንገድ መፈለግ ይገባናል። የዚህ ጉዳይ አሳሳቢነት ከገባቸው ሰዎች አንዱ ጃዋር መሃመድ ነው። ዶር ዐብይን ለመቀበል በሚኒያፖሊስ አየር ማረፊያ ከእንግዳ ማረፊያው እስከ አይሮፕላኗ ከጃዋር ጋር በአንድ መኪና ነው የሄድነው። ባለችን ትንሽ ደቂቃም ስንጨዋወት በቲም ለማ እና በህወሓት አመራሮች መካከል የሰፈነው መካረር እንዳሳሰበውና ሁላችንም ይህን ለመፍታት መጣር እንዳለብን እሱም ይህን ችግር ለመፍታት ከሁለቱም ጋር እንደሚነጋገር ነግሮኛል። በዚህ አጋጣሚ በሃይማኖት አባቶች መካከል ያለውን ችግር በመፍታት ላይ ያሉ ያገር ሽማግሌዎች በቲም ለማና በህወሓት በካከል ያለውን ችግር ለመፍታት መሸምገል ይኖርባቸዋል።

በህወሓት አመራር በኩል የለውጥ ሃይል የሆኑት አሸንፈው በመውጣት የለውጡ ባቡር ላይ መሳፈር ብቻ ሳይሆን ከነዐብይ ጋር በጋራ መምራት ይገባቸዋል። በትንንሽ ጉዳዮች ላይ የሚኖርን ልዩነት ተመልክቶ እልህ ከመጋባት ይልቅ ትልቁን የአገር እና የህዝብ ጉዳይ ተመልክቶ ግማሽ መንገድ ሄዶ በጋራ ለመስራት መዘጋጀት ይኖርባቸዋል። በመጪው ድርጅታዊ ጉባኤ የለውጡ ሃይል አሸናፊ ሆኖ በአዲስ ሃይል ሊወጣ ይገባዋል። የለውጡ ሃይል ማሸነፍ ያለበት ከነ ዶ/ር ዐብይ ጋር አብሮ ለመስራት ብቻ ሳይሆን በዋናነት የትግራይ ህዝብ ልክ እንደሌላው ኢትዮጵያዊ ለውጥ እንዲመጣ ስለሚፈልግ ነው።

በቲም ለማ በኩልም ከሌሎች ሃይሎች ጋር ለመታረቅ እና ይቅር ለመባባል የሚደረገው ጥረት ከህወሓት ጋርም ሊደረግ ይገባል። በአላስፈላጊ ነገር እልህ መጋባት የተጀመረውን የሰላም እና የእርቅ ጥረት ሊያበላሽ አገሪቱንም የከፋ አደጋ ውስጥ ሊከታት ይችላል። ስለሆነም በሰጥቶ መቀበል እና በመቻቻል ህወሓት ውስጥ ያሉ የለውጥ ሃይሎችን መሳብ ያስፈልጋል። ጠቅላይ ሚኒስትራችንም ከዚህ በኋላ የአገር መሪ መሆናቸውን ተረድተው የሚናገሯቸውን ቃላት መምረጥ ይኖርባቸዋል።

የትግራይ አክቲቪስቶች እና የማህበራዊ ሜዲያ ተጠቃሚዎች ሰሞኑን በትግራይ ኢትዮጵያውያን ላይ የሚደርሰውን የአካል የመንፈስ እና የህይወት ጉዳት በመመልከት ጠቅላይ ሚኒስትሩም ይህን ችግር በተመለከተ ምንም ባለማለታቸው ወደ ጥርጣሬ እየሄዳችሁ እንደሆነ ይታያል። ነገር ግን ጉዳዩን በስክነት ማየት ያስፈልጋል። በአገሪቱ ውስጥ እየተከሰቱ ካሉ ችግሮች አንፃር የትግራይ ተወላጆች በተለየ ትልቅ የሚያስብለው ሁኔታ የለም። ከሚሊዮን የማያንሱ ኦሮሞዎች እና ኢትዮጵያውያን ሶማሌዎች የተፈናቀሉበት፣ በመቶዎች የሚቆጠሩ ኦሮሞዎች እና ኢትዮጵያውያን ሶማሌዎች እየሞቱ ያሉበት ሁኔታ ነው ያለው። በቤኒሻንጉል እና አንዳንድ የኦሮምያ ከተሞችም በመቶዎች የሚቆጠሩ የአማራ ተወላጆች እየሞቱ ያሉበት ሁኔታ ነው ያለው። በደቡብም በመቶዎች ይሚቆጠሩ ወላይታዎች፣ ስልጤዎች፣ ጌዴኦዎች፣ ጉጂዎች እየሞቱ ያለበት ሁኔታ ነው ያለው። ጠቅላይ ሚኒስትሩ ይሄ ሁሉ ጉዳይ ይመለከታቸዋል። ሁሉንም ነገር በአጭር ግዜም ለመፍታት የሚያስችል ሁኔታም የለም። ስለሆነም ግዜ መስጠት ብቻ ሳይሆን እኛም የሰላም ጥረቱ አካል በመሆን ልናግዛቸው ይገባል። አንዱ ጥረት መሆን ያለበት በህወሓት ውስጥ የለውጥ ሃይሉ አሸንፎ እንዲወጣ እገዛ ማድረግነው። ቀጥሎም በህወሓት እና በቲም ለማ መካከል ያለውን ውጥረት እንዲረግብ በሁለቱም በኩልየበኩላችንን ግፊት ማድረግ ነው።

ሌሎች አክቲቪስቶች እና የማህበራዊ ሜዲያ ተጠቃሚዎችም በጊዜያዊ ስሜት እየተነሳሳን የምናስተላልፋቸው አሉታዊ መልእክቶች ሄደው ሄደው ሁላችንንም የሚጎዱ መሆናቸውን ተረድተን ሰከን ባለ ሁኔት መጓዝ ይኖርብናል። መነቋቆሩን ትተን ወንድሜን ላክብረው እህቴን ላክብራት መባባል ይገባናል። መሰልጠን ማለት የልዩነት መጥፋት አይደለም ልዩነትን በመከባበር እና በመተሳሰብ መፍታት ወይንም ማስኬድ ነው።

ሰላም ለሁላቸን

አምላክ አገራችንን ኢትዮጵያን ይባርክ

መርስ ኤ ኪዳን

ከሜኔሶታ ሀገረ አሜሪካ

mersea.kidan@gmail.com

 

 

 

Back to Front Page