Back to Front Page

የኢዜአ ትዝብቶቼክፍል አንድ

የኢዜአ ትዝብቶቼ

ክፍል አንድ

(በደሳለው ጥላሁን-ኢዜአ) 7-13-19

አቤት ጊዜው እንዴት ይሮጣል፡፡እነሆ በአዲስ አበባ ዩኒቨርስቲ ከሁለተኛ ዲግሪ የትምህር ቆይታ በኋላ ወደ ስራ ገበታዬ ከተመለስሁ ድፍን አንድ አመት ሊሞላኝ የ10 ቀናተ እድሜ ብቻ ቀሩኝ፡፡ ይሄን ተከትሎ በተማርኩት የሁለተኛ ዲግሪ ትምህርት ምክንያት በተቋሙ ከሚኖረኝ አራት አመታት የቁም እስረኝነቴና "የጓንታናሞ" የግዞት ቆይታዬ አንድ ዓመት ሊነሳ ነው፡፡

የአዲስ አበባ ዩኒቨርስቲ የሁለት ዓመታት የትምህርት ቆይታዬ እና የተቋሙ የአስራ አንድ ወራት የስራ ጊዜዬ በብዙ መሰናክሎች የተሞላ ነው፡፡ በተለይ የትምህርት ቆይታዬ ለእኔ በጣም አስቸጋሪና ከመሰናክልም በላይ ነበር፡፡

ጉዳዩ በተቋሙ በተለይ ከ2006 ዓ.ም ጀምሮ እኔን ጨምሮ በሌላው የተቋሙ ሰራተኛ ላይ እየተፈጸሙ ካሉ በርካታ በደሎች ውስጥ እንደ አንድ ማሳያ የሚወሰድ ነውና ጠቀመም አልጠቀመም የሚከተለውን ልል ወደድሁ፡፡

Videos From Around The World

"ነገርን ከስሩ ውሃን ከጥሩ" እንዲሉ አበው ነገሩ እንዲህ ነው ጊዜው 2008 ዓ.ም መጨረሻ አካባቢ ተቋሙ ደግሞ አገራዊ የለውጥ ጅማሮውን ተከትሎ ዛሬ ህልውናው ካከተመው የመንግስት ኮሙዩኒኬሽን ጉዳች ጽህፈት ቤት እንደ አንድ ዳይሬክቶሬት ከነበረበት አደረጃጀት ወጥቶ በአዋጅ ራሱን በመቻል እየተንቀሳቀሰ የነበረበት ወቅት፡፡

ታዲያ በዚህ ጊዜ የተቋሙ የእስትራቴጅክ እቅድ አካል የሆነውን የሰራተኛ የአቅም ግንባታ መርሃ ግብር መነሻ በማድረግ ተቋሙ በጋዜጠኝነትና ስነ ተግባቦት የትምህርት ዘርፍ በአዲስ አበባ ዩኒቨርስቲ የሁለተኛ ዲግሪ ትምህርት ለማስተማር ማስታወቂያ ያወጣል፡፡

እኔም እንደ አንድ የራሱን አቅም በትምህርት ለማሳደግ ፍላጎት እንዳለው ሰራተኛ የወጣውን ማስታወቂያ ሳየው በጣም ደስ አለኝ ጊዜም ሳልሰጥ ተመዘገብሁ፡፡ እኔን ጨምሮ እድሉን ለማግኘት ከተመዘገበው 40 ያህል የተቋሙ ሰራተኛ ውስጥ የመመልመያ መስፈርቱን ያለፍን 10 ሰዎች ተመረጥን፡፡

ታዲያ የተቋሙን መመዘኛ ስላለፍን ብቻ ትምህርት አንጀምርምና እኔም ሆንኩ ሌሎች ጓደኞቼ የአዲስ አበባ ዩኒቨርስቲ ያወጣውን የመግቢያ ፈተና መርሃ ግብር በመጠበቅ ፈተናውን ተፈተንን፡፡ ከቀናት በኋላ ፈተናውን ከተፈተን የተቋሙ አስር ሰዎች ውስጥ አምስታችን ፈተናውን ስናልፍ ሁለት ሰዎች ደግሞ ተጠባባቂ ሆኑ፡፡

እውነት ለመናገር የሌሎች የስራ ባልደረቦቼን ስሜት ባላውቅም ትምህርት ለመማር ከነበረኝ ፍላጎት አንጻር ፈተናውን ማለፌን ስሰማ እጅግ በጣም ደስ አለኝ፡፡ ጊዜ ሳልሰጥ ወደ አዲስ አበባ ዩኒቨርስቲ በማቅናት የተለጠፈውን የፈተና ውጤት አየሁ የኔም ሆንኩ የአራቱ የስራ ባልደረቦቼ በመግቢያ ፈተናው ያመጣነው ውጤት እጅግ በጣም ጥሩ ነበር፡፡

የትምህርት እድሉ በተቋሙ ለመጀመሪ ጊዜ የተሰጠ እንደመሆኑ መጠን በፈተናው ማለፋችን ከተሰማ በኋላ እኔ እየሰራሁ በምገኝበት የአዲስ አበባው ዋና ቢሮም ሆነ በክልል ቅርንጫፎች ከሚገኙ የሙያ ባልደረቦኖቻችን በአካልም በስልክም የእንኳን ደስ አላችሁ መልክቶች መጉረፍ ጀመሩ፡፡ ይሄ ደግሞ በወቅቱ የፈጥረው ደስታ ልዩ ነበር፡፡

በዚህ ወቅት ታዲያ አንዳንድ የዋና ዳይሬክተሩ የቅርብ ወዳጆች እኔንም ሆነ ፈተናውን ያለፉ ሌሎች የስራ ባልደረቦቼን በግል ሂዱና ዋና ዳይሬክተሩን አመስግኑት፣ በእስዎ መጀን በሉት እያሉ ይጎተጉቱን ነበር፡፡

ነገር ግን በወቅቱ እኔም ሆንኩ ሌሎች የሙያ ባልደረቦቼ የመልክተኞችን ሃሳብ አልተቀበልነውምና በተናጠልም በቡድንም ሂድን አላመሰገንም፤ምስጋና ባያስፈልገውም ቅሉ፡፡

ጊዜ ቁሞ አይጠብቅምና ትምህርት የሚጀመርበት ጊዜ በመድረሱ እኔም ሆንኩ ጓደኞች ከላፕቶብ ውጭ የስራ መሳሪያዎቻችንን አስረክበን ፈተናውን ያለፍን አምስቱ ሰራተኞች በጋዜጠኝነትና የስነ ተግባቦት ትምህርት ዘርፍ፣ ተጠባባቂ የነበሩት ሁለቱ የሙያ ባልደረቦቼ ደግሞ በህዝብ ግንኙነት ትምህርት ዘርፍ ትምህርታችንን ቀጠልን፡፡

እውነት ለመናገር ሌላው የተቋሙ ሰራተኛም እንደሚመሰክረው በወቅቱ ለትምህርት የገባነው ሰባቱም የተቋሙ ሰራተኞች በየተመደብንበት የስራ ክፍል ከሰኞ እስከ ሰኞ 24 ሰዓት ሊባል በሚችል መልኩ የተቋሙን ተልዕኮ ለማሳካት የምንሰራ ነበር፡፡ ይሄም በወቅቱ ዋና ዳይሬክተሩ ያለምንም ማቅማማት በየመድረኩ አፋቸውን ሞልተው ይናገሩት የነበረው ነው፡፡

ሁላችንም የትምህርት እድል ተጠቃሚዎች ትምህርት እየተማርንም ቢሆን በትርፍ ሰዓታችን ተቋሙን ለማገዝ ፍላጎት ነበረን አንዳንዶቻችን ትምህርት በጀመርን ጥቂት ወራት አካባቢ በቅርብ ኃላፊዎቻችን በኩል ተጠርተን አንዳንድ ስራዎችን አግዘናል፡፡

ነገር ግን ዋና ዳይሬክተሩ በወቅቱ እኔም ሆንኩ ሌሎች የሙያ ባልደረቦቼ በማናውቀው ምክንያት የነብር አራስ ሆኑ፣ ወትሮም ቢሆን ኩርፊያ የሚቀናቸው እሳቸው አይናችሁን ላፈር አሉን፡፡ አሰራርና መርህን አክብሮ ከመስራት ይልቅ ዋና ዳይሬክተሩ ሲደሰቱ የሚደሰቱት፣ ሲከፋቸው የሚከፉት የማኔጅመንት አባላትም እንዲሁ፡፡

በወቅቱ አማራጭ ያልነበረን እኛም ትምህርቱ በራሱ የተቋሙ ተልዕኮ ነውና ትምህርታችን ላይ በርትተን መስራት ጀመርን፡፡

ነገር ግን ትምህርት ከጀመርን ከስድስት ወራት በኋላ አንድ ክስተት ተከሰተ ለተቋሙ ሰራተኛ የሚከፈለው ደመወዝ ሰራተኛው ከሚሰራው ስራ አንጻር እና ሌሎች የመንግስትም ሆነ የግል መገናኛ ብዙኃን በወቅቱ ከሚከፍሉት ደመወዝ ጋር የሚመጣጠን ባለመሆኑ ስራተኛውን በስራ ገበታው ላይ ማቆየትን ታሳቢ ተደርጎ የጥቅማ ጥቅም መመሪያ እንዲወጣ ይደረጋል፡፡

ልብ በሉ እንግዲህ የጥቅማ ጥቅም መመሪያው የወጣው በአዳማ ከተማ ለሶስት ተከታታይ ቀናት ሁሉ ነገር ተሟልቶላቸው በከተሙ ሶስት የተቋሙ የማኔጅመንት አባላትና በዋና ዳይሬክተሩ አቅጣጫ ሰጭነት ነው፡፡

የጥቅማ ጥቅም መመሪያው መውጣቱ እሰየው ባልከፋ ነበር፡፡ ነገር ግን መመሪያው ከወጣ በኋላ ሰራተኛ ሳይወያይበትና የሚጨመረው ተጨምሮ የሚቀነሰው ተቀንሶ የራሱ ሳያደርገው፣እኛም ተማሪዎች ምንም አይነት መረጃ ሳይኖረን ሰራተኛ እንደተወያየበት ተደርጎ ወደ ጠቅላይ ሚኒስትር ጽህፈት ቤት ተላከ፡፡

የጠቅላይ ሚኒስትር ጽህፈት ቤትም በተቋሙ የጥቅማ ጥቅም መመሪያ ላይ ሙያዊ አስተያየት እንዲሰጥበት በወቅቱ ለነበረው ወደ ፐብሊክ ሰርቪስ እና የሰው ሀብት ልማት ሚኒስቴር ይልከዋል፡፡

ጉዳዩ የተላከለት የፐብሊክ ሰርቪስ እና የሰው ሀብት ልማት ሚኒስቴርም የሚጨመረውን ጨምሮ የሚቀነሰውን ቀንሶ የጥቅማ ጥቅም መመሪያውን ወደ መራለት የጠቅላይ ሚኒስትር ጽህፈት ቤት በመላክ "የኢትዮጵያ ዜና አገልግሎት ኤጀንሲ የጥቅማ ጥቅም አገልግሎት መመሪያ ቁጥር 010/2009" ሆኖ እንዲጸድቅ አደረገ፡፡

ገና ከመጀመሪው በትምህርት ላይ የምንገኝ የተቋሙን ሰራተኞች አይናችሁን ላፈር ብለው ለሰላምታ እንኳን የተጸየፉን የተቋሙ ዋና ዳይሬክተር ተንኮል ቢጤ አስበው የጥቅማ ጥቅም መመሪያው የመጨረሻ አንቀጽ ላይ ልዩ ልዩ ድንጋጌ በሚለው አንቀጽ ስር በትምህርት ላይ ያለ ትምህርቱን አጠናቆ እስከ ሚመለስ የጥቅማ ጥቅም እድሉ ተጠቃሚ አይሆንም የሚል ሃሳብ እንዲጨመር ያደርጋሉ፡፡

በወቅቱ የ2ኛ ዲግሪያችንን እየተማርን የነበርን የተቋሙ ሰራተኞች የጥቅማ ጥቅም መመሪያውን መውጣትና መጽደቅ እንዲሁም የእኛን ተጠቃሚነት ያገለለ መሆኑን ስንሰማ ሰባታችንም ተሰባስበን መከርን፡፡ በተስማማንበት መሰረትም ጉዳዩ እንዲታይልን ለተቋሙ ዋና ዳይሬክተር አመለክትን፡፡

ያለምንም መነሻ ምክንያት ተማሪዎቹን እንደ ነፍሰ ገዳይ ማየት የጀመሩት ዋና ዳይሬክተሩ የእኛን ስሜት ተረድተውና የተቋሙ አሰራር በሚፈቅደው አግባብ በማነጋገር ችግሩን ከመፍታት ይልቅ ጉዳዩን ለተቋሙ የቅሬታ ሰሚ ኮሚቴ ይመሩታል፡፡

በጉዳዩ ላይ የውሳኔ ሃሳብ ለመስጠት ግራ የተጋቡት የቅሬታ ሰሚ ኮሚቴ አባላት ሙያዊ ምክር ለመጠየቅ ጉዳዩ ወደ ሚመለከታቸው በወቅቱ የነበረው የፐብሊክ ሰርቪስ እና የሰው ሀብት ልማት ሚኒስቴር ባለሙያዎችን ሙያዊ ምክር በደብዳቤም በአካልም ይጠይቃሉ፡፡

"ባለሙያዎቹም ጉዳዩ እኮ እዚህ ድረስ የሚደክማችሁ አይደለም በተቋሙ የበላይ ኃላፊ ውሳኔ የሚያልቅ ነው ከመጀመሪውስ እንዴት ይከለከላሉ ከተቋሙ አልተሰናበቱ ደግሞስ 'መስሪያ ቤቱ መኖሪያ ቤት ሰጥቶት የነበረውን ሰራተኛ ትምህርት ስለጀመርህ ከመኖሪያ ቤትህ ውጣ ይለዋል?' ይዛችሁት የመጣችሁት ጉዳይም ይህ ማለት ነው" ሲሉ በምሳሌ አስረድተው ይመልሷዋል፡፡

ይሄንን የሰሙት ዋና ዳይሬክተሩ እሳት ጎርሰው እሳት ለብሰው ማን ሂዱ አላችሁ በመመሪው መሰረት ጥቅማ ጥቅም እንደማያገኙ ጠቅሳችሁ አትጽፉም ወይ በማለት አንዳንድ የኮሚቴ አባላትን ዱላ ቀረሽ ስድብ ይሰድባሉ፡፡

በዚህ የተደናገጡትና የስራ ዋስትናቸው ያሰጋቸው የኮሚቴው አባላት መመሪው ላይ የተቀመጠውን ሃሳብ መነሻ በማድረግ ጥቅማ ጥቅም ማግኘት እንደማንችል የሚገልጽ ደብዳቤ እንዲደርሰን አደረጉ፡፡

እኛም ጥያቄያችን በዚህ ተዳፍኖ መቅረት የለበትም እንዴት ባልፈረምነው እና እኛ ትምህርት ከጀመርን ከስድስት ወራት በኋላ የወጣ መመሪያ በኛ ላይ ተፈጻሚ ይሆናል በሚል መነሻ ህግን ጠንቅቀው የሚያውቁ የህግ ባለሙያዎችን አማከርን እነሱም "ልትከለከሉ አይገባም በምንም ሁኔታ ህግ ወደ ኋላ ሂዶ ተፈጻሚ ሊሆን አይችልም" አሉን፡፡

ይሄንኑ መነሻ በማድረግ ጉዳዩን በወቅቱ ወደ ነበረው የፐብሊክ ሰርቪስ እና የሰው ሀብት ልማት ሚኒስቴር አስተዳደር ፍርድ ቤት ወሰድነው፡፡ በጥያቄያችን መሰረትም ፍርድ ቤቱ ጉዳያችንን ማየት ጀመረ ተቋሙም በቀጠሮ ቀን እንዲቀርብ የሚል የፍርድ ቤት መጥሪያ ደረሰው፡፡

ምን እናድርግ የመብት ጉዳይ ሆኖብን መስሪያ ቤታችንን ፍርድ ቤት እንዲቆም አደረግነው፡፡ በቀጠሮ ቀን መስሪያ ቤቱን በመወከል የተቋሙ የህግ ባለሙያ ተገኘች፡፡

ጉዳያችንም መታየት ጀመረ "ዳኞችም ለህግ ባለሙያዋ ሰባት ሰው ስራ አስፈትቶ ማንገላታት ጥሩ አይደለም እኛም ሌላውም ሰው ይታዘባችኋል ሂዱና ችግራችሁን በውስጥ ፍቱ ለአለቆችሽም ይህንኑ ንገሪያቸው ትባላለች፡፡"

ዋና ዳይሬክተሩ ይሁንኑ ጉዳይ ሲሰሙ በጣም ይናደዳሉ የመሸነፍ ስሜት ተሰምቷቸውም ወደ ሌላ በቀል እና እልህ ተሸጋገሩ ስልጣንና ገንዘብ ካለ ሁሉ ነገር ሙሉ ሁሉ ነገር ዝግጁ አይደል የሚባለው፡፡

ይሄን ተከትሎም የህግ ባለሙያዋን ከጉዳዩ ዘወር እንድትል በማድረግ በሲቪል ሰርቪስ ዩኒቨርስቲ አንቱ የተባሉ የህግ መምህርና ጠበቃን በእኛ ተበደልን መብታችን ይከበርልን እያልን በምንጮኸው የተቋሙ ሰራተኞች ቀጥረው ያቆማሉ፡፡

እኔም ሆንኩ ሌሎች ባልደረቦች ጠበቃው ምን ያህል ብር እንደተከፈላቸው፣ ብሩስ የትኛ የፋይናንስ ህግ በሚፈቅደው አግባብ እንደተከፈለ እና ኦዲት እንደተደረገ ባናውቅም፡፡

ያም ሆነ ይህ በአዲሱ ጠበቃ የፍርድ ቤቱ ክርክር ቀጠለ እኛ የተቋሙ ተስፈኞች ምን አቅም አለንና ጠበቃ ቀጥረን እናቆማለን፡፡ ተቋሙ አዲስ ጠበቃ ቀጥሮ ሲቆም ሲያዩ ዳኞች መታዘባቸው ሳይታለም የተፈታ ነበር፡፡

በወቅቱ ይሄ እንዴት ይሆናል ህጉስ ይፈቅዳል በተቋሙ የመልካም አስተዳደር ችግር ደርሶብናል ብለን ለጠየቅን ሰራተኞች ያውም ወርሃዊ ደመወዝ የሚከፈላት የህግ ባለሙያ እያለች እንዴት ከውጭ ጠበቃ ይቀጠርብናል በሚል ፍርድ ቤቱን ጠየቅን ፍርድ ቤቱም ተቋሙ ካመነበት ይችላል የሚል መልስ ሰጠን፡፡

አይ አለማወቅ ደጉ እኔም ሆንኩ ሌሎች የሙያ ባለደረቦቼ እሺ ይሁን ከማለት ውጭ ምንም አማራጭ አልነበረንም፡፡ ክርክሩም ቀጠለ ለተወሰኑ ወራትም ውሳኔያችን ፍርድ ሳያገኝ ተጉላላን የሆነው ሆነና የመጨረሻው ቀነ ቀጠሮ እየደረሰ ነው እኛም ውሳኔያችን ትክክለኛ ፍትህ ያገኛል ከሚል መነሻ ሃሳብ እንደምናሸነፍ እና ጥቅማ ጥቅማችን እንደሚፈቀድልን ተስፋ አደረግን፡፡

በዚህ በኩል ደግሞ በዋና ዳይሬክተሩ፣ በተቀጠረው ጠበቃና በአንዳንድ የማኔጅመንት አባላት መካከል ከፍተኛ መረጋጋትና የአሸናፊነት ወኔ ይታያል "ጌታዋን የተማመነች- - -"አይደል የሚባለው፡፡

የቀጠሮው ቀንና ሰዓት ደረሰ በእኔም ሆነ የሙያ ባልደረቦቼ ፊት የአሸናፊነት መንፈስ ይነበባል በወዲያ በኩል ደግሞ የተቋሙ ቅጥረኛ ጠበቃ ከፍተኛ የራስ መተማመን ሁኔታ ግራ ያጋባል፡፡

ዳኞች ቦታ ቦታቸውን ያዙ በዳኞች ላይ ግራ የመጋባት ስሜት ይታያል የሆነው ሆነና የእኛ የመጨረሻ ውሳኔ መነበብ ጀመረ፡፡ "ጥቅማ ጥቅሙን ትምህርታችሁን ጨርሳችሁ ስትመለሱ ታገኙታላችሁ" የሚል ምክር ተሰጠንና ከፍርድ ቤት አዳራሹ ወጣን፡፡

እውነት ለመናገር የሌሎች ጓደኞቼን ስሜት ባላውቅም ያቺ ቀን በህይወቴ ያዘንኩባትና እና በፍርድ ውሳኔዎች ላይ የነበረውን ፍርደ ገምድልነት በራሴ ደርሶ ያረጋገጥሁባት ናት፡፡ በሰዓቱ የፍርድ ሂደቱንም ዳኞችንም በማመነው ፈጣሪ ስም ረገምኩ፡፡

በወቅቱ በቦታው ስንናደድ ያዩ አንዳንድ የፍርድ ቤቱ ሰራተኞች አይዟችሁ ይሄ የሚጠበቅ ነው ዳኞች በነጻነት እንዳይሰሩ የሚኒሰቴር መስሪያ ቤቱ የስራ ኃላፊዎች ጣልቃ ይገቡባቸዋል፡፡ በዚህ ተስፋ አትቁረጡ ጉዳያችሁን ወደ ፌዴራል ጠቅላይ ፍርድ ቤት ውሰዱት የሚል ምክር ሰጡን፡፡

እኛም የሰራተኞችን ምክር ተቀብለንና ሌሎች የህግ ባለሙያ ጓደኞቻችንን አማክረን ጉዳዩን ወደ ፌዴራል ጠቅላይ ፍርድ ቤት በምንወስድበት ጉዳይ ላይ መነጋገር ስንጀምር ከሰባታችን ውስጥ ሶስቱ የስራ ባልደረቦቻችን ምንም ፍትህ በሌለበት አገር ላይ ለተጨማሪ ጊዜ መስዋት እንደማይከፍሉ ነግረውን ተለዩን፡፡

"የፈራ ይመለስ" ነውና ብሂሉ አራታችን ባለጉዳዮች ጉዳዩን ወደ ፌዴራል ጠቅላይ ፍርድ ቤት ወሰድን፡፡ የፍርድ ቀነ ቀጠሮው ደረሰና ፍርድ ቤት ቀርበን፡፡ በሰዓቱም ምክንያቱን በማናውቀው ሁኔታ የእኛን ጉዳይ ለመመልከት የተሰየሙት ዳኞች የነብር አራስ ሆኑብን ሀሳባችንን እንኳን በተገቢው መንገድ ለመግለጽና ለማስረዳት ጊዜ ሊሰጡን አልፈለጉም፡፡

ጉዳዩን በሚገባ ላጤነው ወዴት ወዴት ነው ነገሩ ይሄ ነገር በስልክ ቀድሞ ነው እንዴ የሚያልቀው ያስብላል፡፡ እኔም ሆንኩ የስራ ባልደረቦቼ በወቅቱ የተሰማንና የተረዳነው በዚህ መልኩ ነው፡፡

የመጨረሻው የፍርድ ቤት የውሳኔ ቀን ደረሰ፡፡ ነገር ግን ከመካከላችን ማንም ጥሩ ነገር አልጠበቀም ውሳኔውን በአካል ቀርበን መስማት ስላለብን ብቻ ሄድን በውሳኔው ላይ ምንም የተጣቀሰ የህግ አንቀጥ የለም፡፡

ለምን ብለን ለመጠየቅ ብንሞክርም ዳኞቹ እኛን የመስማት ፍላጎት አልነበራቸውም "ጥቅማ ጥቅሙ አይገባችሁም የፐብሊክ ሰርቪስ እና የሰው ሀብት ልማት ሚኒስቴር አስተዳደር ፍርድ ቤት የወሰነው ውሳኔ ትክክል ነው" የሚል ውሳኔ ተሰጥቶን ተመለስን፡፡

የእኛም እጅግ አስቸጋሪውና ከሁለተኛ ዲግሪ ትምህርታችን ጎን ለጎን ከተቋሙ እስከ ፌዴራል ጠቅላይ ፍርድ ቤት የተጓዘው የመልካል አስተዳደር ጥያቄያችን በዚህ መልኩ ተደመደመ፡፡

እዚህ ላይ ግን እንደ አንድ ሙያውን የሚወድ ጋዜጠኛ ለገንዘብና ለጥቅም ብለው እጅግ የተከበረውን የህግ ሙያ ዝቅ አድርገው ተዋርደውና አዋርደው በማያገባቸው የውስጥ ጉዳይ ገብተው እኛ ትክክለኛውን ፍርድ እንድናጣ ላደረጉ ከእኛም በኋላ በጥቅማ ጥቅም መመሪያው ስም እንዲቀጡና በተቋሙ ላይ ጥላቻ እንዲኖራቸው ላደረጉ የሲቪል ሰርቪሱ የህግ መምህርና ጠበቃ በስራቸው ሊያፍሩ እና ላደረሱት በደል ይቅርታ ሊጠይቁ ይገባል እላለሁ፡፡

የሚገርመው ነግር ግለሰቡ በወቅቱ የጀመሩት ግንኙነት ቀጥሉ በህግ አገልግሎት ማማከር ሽፋን እስካሁኗ ሰዓት ድረስ በሰበብ አስባቡ ጉዳይ እየተፈለገ የተቋሙ ከፍተኛ የገንዘብ ተጠቃሚ ሆነው ቀጥለዋል፡፡

ክፍል-2

ለራስ ሲቆርሱ እንዲሉ ዋና ዳይሬክተሩ በመንግስት ከተሰጣቸው መኖሪያ ቤት፣ተሸከርካሪ፣ የቀጥታ መስመር ስልክና መደበኛ ደመወዝ ውጭ በጥቅማ ጥቅም መመሪያው ለኃላፊነት አበል 1 ሺህ 500 ብር፣የመኖሪያ ቤት ኪራይ አበል 5 ሺህ ብር፣ የመስተንግዶ 2 ሺህ ብር በድምሩ 8 ሺህ 500 ብር ጠይቀውና አስጠይቀው የመኖሪያ ቤት ኪራይ አበል 2 ሺህ 500 ብር፣የኃላፊነት አበል 1 ሺህ 500 አጠቃላይ ከጠየቁት 8 ሺህ 500 ብር፤ 4 ሺህ 500 ብር ተቀንሶ 4 ሺህ ብር ተፈቅዶላቸው ተጠቃሚ ሆነዋል፡፡

በሌላ በኩል ደግሞ ህዝብን፣ ተቋሙንና የተቋሙን ሰራተኛ እንዲያገለግሉበት በመንግስት የተሰጣቸውን ከፍተኛ የስራ ኃላፊነት ለራሳቸው መገልገያ ያደረጉት ዋና ዳይሬክተሩ እና በመዋቅር ስም ከየቦታው በጓደኝነትና በጥቅም ኔት ወርክ ያሰባሰቧቸው የተቋሙ የተለያዩ የስራ ክፍል ኃላፊዎችና የማኔጅመንት አባላት ስልጣናቸውን ያላግባብ በመጠቀም የተቋሙ የትምህርትና መመሪያ ከሚፈቅደው አግባብ ውጭ ሙሉ ጥቅማ ጥቅማቸው ተጠብቆላቸው፣ ስራ ለመስራት እንኳን አስቸጋሪ በሆነበት የተሽከርካሪ እጥረት ስራ በማስተጓጎል የተቋሙ ተሽከርካሪዎችን ከተቋም ትምህርት ቤት፣ከትምህርት ቤት የመኖሪ ቤታቸው ድረስ በመጠቀም በተቋሙ ላይ በደል አድርሰዋል፡፡

የሚገርመው ነገር ዋና ዳይሬክተሩም ሆነ የማኔጅመንት አባላት ሙሉ ጥቅማ ጥቅማቸውን ጠብቅና አስጠብቀው ሊድ እስታር በተባለ የግል ኮሌጅ የ2ኛ ዲግሪቸውን የተማሩት እና እየተማሩ የሚገኙት የኮሌጁ አካል ለሆነው ለLTV ቴሌቭዥን የተቋሙን ዜና በነጻ እየሰጡ መሆኑ ሲሰማ ምን ያህል ግፈኞችና ራስ ወዳድ መሆናቸውን ፍንትው አድርጎ ያሳያል፡፡

የሆነውም ሆነና እኛም ዋና ዳይሬክተሩም የሁለተኛ ዲግሪ ትምህርታችንን በተመሳሳይ ጊዜ አጠናቀን ተመረቅን፡፡ የእሳቸው የምርቃት ስነ ስርዓት በመስሪያ ቤት የቪዲዮና ፎቶ ካሜራ ባለሙያዎች በመታጀቡ ከእኔም ሆነ ከጓደኞች ምርቃት ቢለኝም ቅሉ፡፡

ያልገባኝ ነገር ግን ሌላው ቢቀር እንኳን ሰውየው እንዴት የሁለተኛ ዲግሪ የትምህርት ዝግጅት ሳይኖራቸው ይሄንን አንጋፋ ተቋም እንዲመሩ ተሾሙ፣ ምንስ ስጋት ኖሯቸው ነው የእኔም ሆነ የጓደኞቸን ትምህርት መጀመር ተከትሎ ትምህርት ለመጀመርና በተመሳሳይ ጊዜ ለመመረቅ ጥድፊያ ያደረጉት፡፡

ይሄን ሁሉ በደል በወቅቱ የነበሩ ከኮሙዩኒኬሽን ጉዳዮች ጽህፈት ቤት እስከ ጠቅላይ ሚኒስተር ጽህፈት ቤት፤ ከጠቅላይ ሚኒስትር ጽህፈት ቤት እስከ ህዝብ ተወካች ምክር ቤት ድረስ ከፍተኛ የስራ ኃላፊነት የነበራቸውና ችግሩን በወቅቱ ማስተካከል የሚስችል አቅም የነበራቸው አንዳንድ ቱባ ባለስልጣናት ከእውነት ይልቅ ማንነትንና ጓደኝነት በማስቀደም የዋና ዳይሬክተሩን ጥፋት መሸፈናቸውና ሰውየው ተቋም የመምራት አቅምና ስነ ምግባር እንደሌላቸው እያወቁ ከዚህም ከዚያም የሚሰሙ ጩኸቶችን እየሰሙ እንዳልሰሙ መሆናቸው ለሰውየው የልብ ልብ ሆኗቸዋል፡፡

የሆነው ሆነና ይሄም እንደዚህ አለፈ፡፡ እኔም ሆንኩ ሌሎች በወቅቱ ትምህርታችንን አጠናቀን በ2010 ሐምሌ ወር ወደ ተቋሙ የተመለስን አምስት ሰራተኞች በገባነው ውል መሰረት ትምህርታችንን አጠናቀን መመለሳችንን ጠቅሰን ምደባ እንዲሰጠን በደብዳቤ ጠየቅን፡፡

በወቅቱ ከተቋሙ ይወጡ የነበሩ መረጃዎች አምስታችንም ባለሙያዎች የስራ ፍላጎታችን ሳይጠበቅና ምንም አይነት የደረጃ እድገት ሳይኖር በያዝነው የስራ ደረጃና ደመወዝ መመደባችንን የሚገልጹ መረጃዎች ቢሰሙም እኔም ሆንኩ ሌሎች የሙያ ባልደረቦቼ ከመጠራጠር ውጭ መረጃውን ሙሉ በሙሉ አላመንም፡፡

በወቅቱም ዋና ዳይሬክተሩ እንዲህ ተኮራርፈን ስራ መስራት ስለማይቻል ችግራችንን ተነጋግረን በመፍታት ወደ ስራ መግባት አለብን፣የስራ አቅጣጫም መውሰድ አለባችሁ ከሚል መነሻ ሃሳብ የስብሰባ መድረክ ያመቻቻሉ፡፡

በስብሰባ መድረኩ እኛ አምስቱ ሰራተኞችን ጨምሮ የተቋሙ ምክትል ዋና ዳይሬክተር እና በወቅቱ የተቋሙ የሰው ሃብት አስተዳደር ዳይሬክተር የነበሩት ግለሰብ/ግለሰቡ በአሁኑ ሰዓት በተቋሙ ዋና ዳይሬክተር ጫና ምክንያት መደበኛ የጥሮታ መውጫ ጊዜቸው ሳይደርስ ተቋሙን መልቀቃቸው ልብ ይሏል/ነበሩ፡፡

በተቋሙ ዋና ዳይሬክተር መሪነት የተጀመረው ስብሰባ ሃሳብ ሃሳብን እየወለደ የልብ የልባችንን መነጋገር ጀመርን፡፡ ለማስመሰያ ሪፖርትና በታዛቢነት የተቀመጡ የሚመስሉት ሁለቱ የስራ ኃላፊዎች በአብዛኛው ዝምታን ቢመርጡም እኛ እና እሳቸው ግን ብዙ ነገሮችን ለሰዓታት መመላለስ ጀምርን፡፡

ዋና ዳይሬክተሩ "የትምህር ዝግጅት አሻሽላችሁ ስለመጣችሁ የተሻለ ስራ ትሰራላችሁ ማለት አይደለም፣ ተቋሙ በሚፈልገው የስራ ዘርፍ መድቦ የማሰራት መብት አለው፣የተሻለ የስራ መደብ ላይ እንመደባለን፣ደመወዝም ይጨመርልናል ብላችሁ እያሰባችሁ ያላችሁ ካላችሁ ከአዕምሮአችሁ አውጡት ሁላችሁም ከአሁን በፊት ይዛችሁት ከነበረው የስራ መደብ ጋር በሚመጣጠን ደረጃ እና ደመወዝ ተመድባችሁ ትሰራላችሁ የሚል ማስፈራሪያና ዛቻ በሚመስል ድምጸት ንግግራቸውን ማሰማት ቀጠሉ፡፡

እኛም ተቋሙ የያዘው አቋም ትክክል አይደለም አቅም አዳብረን መጥተናል የትምህርት ዝግጅታችን በሚፈቅደው ደረጃና ደመወዝ ተመድበን እኛም መጠቀም ተቋሙንም መጥቀም እንፈልጋለን፡፡ እየሰማን እንዳለው ሁላችንንም አንድ የስራ ክፍል እንደመደባችሁን ነው ይሄ ደግሞ የተቋሙ አመራር ከቂም በቀል አለመውጣቱን ያሳያል፤ ይሄንን ቆም ብላችሁ እዩት ያለፈው አልፏል ከአሁን በኋላ ሁሉን ነገር ረስተን በሰላም ስራችንን መስራትና ተቋሙን ማገልገል ነው የምንፈልገው በሚል ሃሳባችንን ገለጽን፡፡

የዚህ ሁሉ የችግር ምንጭም አንተ ዋና ዳይሬክተሩ ነህ ሁሉን ነገር በወቅቱ ማስተካከል ትችል ነበር ገና የዩንቨርስቲ መግቢያ ፈተናውን እንዳለፍን ወደ ማኩረፍና ሰላምታ መከልከል ነው የገባኸው ይሄ ደግሞ በወቅቱ እኛንም ቅር አሰኝቶናል ይሄ መሆን አልነበረበትም በሚል ሃሳባችንን አከልን፡፡

ሁሌም መሸነፍን እንደ ጥቃት የሚቆጥሩት ዋና ዳይሬክተሩ በወቅቱ ያኮረፍኩባችሁ ከአንድ ሰው ውጭ (በወቅቱ አለፈ የተባለው ግለሰብ ስም ባይገለጽም) ሁላችሁም ፈተናውን ማለፍ ባለመቻላችሁ የዚህ ጽሑፍ ጸሐፊ ለጊዜው ስማቸውን መጥቀስ አስፈላጊ መሆኑን ያላመነባቸውና በወቅቱ የትምህርት ክፍሉ ኃላፊ የነበሩትን ግለሰብ ስም በመጥቀስ ከእሳቸው ጋር በመነጋገር ፈተናውን ያለፉ የስድስት ንጹህ ኢትዮዽያውያን ውጤት ተሰርዞ እና የእነሱ ህይወት ተበላሽቶ እናንተ እንድትገቡ አድርገናል በሚል የሀሰት ድርሰታቸውን ማነብነብ ጀመሩ፡፡

ይሄን በሰማሁበት ቅጥበት ሰውነቴን በጣም ወረረኝ የዋና ዳይሬክተሩን ቀጣፊና አስመሳይነት የበለጠ እንዳይ አደረገኝ፡፡

በወቅቱ ሁሉም ስሜቱን መቆጣጠር አቃተው፡፡ ስርዓት ባለው አግባብ የመግቢያ ፈተናውን አልፈን ውጤታችን ተለጥፎ ትምህርቱን ለመውሰድ ዝግጁ መሆናችን ተረጋግጦ በዩኒቨርስቲው ትምህርታችንን ተከታትለን በሁለት ዓመት የትምህርት ቆይታችንም በከፍተኛ ውጤት እንደተመረቅን እያወቁ ሁሉን ነገር ገደል ከተውና የእኛን ሞራል የነኩ መስሏቸው ከአንድ የተቋም አመራር በማይጠበቅ መልኩ ይሄን ሲናገሩ ይሄን ጽሑፍ የሚያነበውም ቢሆን በወቅቱ በእኛ ቦታ ቢሆን የሚያደርገው ነው፡፡

እኛም በወቅቱ ለንግግራቸው አጻፋ መልስ መስጠት ጀመርን፡፡ "በለፈለፉ በአፍ ይጠፉ" እንዲሉ ሳያስቡት የፈጠራ ድርሰታቸውን የተናገሩት ዋና ዳይሬክተሩ ከፍተኛ መረበሽ ውስጥ ገቡ ከዚህ በኋላ አራንባና ቆቦ የሚረግጥ ዛቻቸውን መዘርገፍ ጀመሩ "ያልከሰሳችሁን ቦታ የለም የክሳችሁ ዶክመንት እጄ ላይ ገብቶ እኔም ሆነ የማኔጅመንት አባላት በጋራ አንበነዋል፤ የትም ብትደርሱ ምንም አታመጡም ፓርላማም፣ ጠቅላይ ሚኒስትር ጽህፈት ቤትም ሁሉም ምንሰራህ ነው እንጅ የሚለኝ ማንም ምንም አያመጣም" የሚል ንግግራቸውን ቀጠሉ፡፡ የትም ቦታ ከእናንተ ይልቅ የእኔ ስም ተገንብቷል፣ ከእናንተ ጩኸት ይልቅ የእኔ የውሸት ሪፖርት ተቀባይነት አለው ነው መልክቱ፡፡

ገና ከመጀመሪያው የተረበሸው ስብሰባ ያለምንም መግባባት በዛቻ እና በማስፈራራት ተጠናቀቀ፡፡ አንጋፋውን የአዲስ አበባ ዩኒቨርስቲ፣ በወቅቱ የነበሩትን የትምህርት ክፍሉን የስራ ኃላፊ እንዲሁም የእኛን ስም ያጠፋና ሞራል የነካ የስም ማጥፋት ንግግራቸው ፍርድ ቤት አስቁሞ እንደሚያስቀጣቸው ብናውቅም ለተቋሙና በተቋሙ ስም ለተሰጣቸው ከፍተኛ የመንግስት የስራ ኃላፊነት ክብር ስንል ጉዳዩን እንዳልሰማን በይደር አቆየነው፡፡

ያቺ ቀን የሰው ሃብቱ የስራ ኃላፊን ጨምሮ ሁሉም የስራ ኃላፊዎች መረበሽ ውስጥ የገቡባት ነበረች አንድ ክፍል ውስጥ እንድንታጎር ተደርጎበት የነበረው የሞት ደብዳቤያችን ተቀይሮ ያለምንም እድገት ለትምህርት ከመሄዳችን በፊት በነበርንበት የስራ ክፍል በያዝነው ደረጃና ደመወዝ መመደባችንን የሚገልጽ ደብዳቤ ተሰጠን፡፡

ኑሮውንም ስራውንም ክፍለ ሀገር አድርጎ የነበረውና የትምህር እድሉ ተጠቃሚ የነበረው የስራ ባልደረባችን ለሌላ በቀልና ስቃይ በያዘው ደረጃና ደመወዝ በአዲስ አበባ እንዲሰራ ተፈርዶበት የነበረው የቅጣት ደብዳቤም ተቀይሮ በነበረበት ቦታ በያዘው ደረጃና ደመወዝ እንዲሰራ ተደረገ፡፡

ከማኔጅመንት አባልነት ለማራቅ የተፈለገው አንድ የስራ ባልደረባችን የኃላፊነት ቦታው በሲቪል ሰርቪስ ህጉ እስከ ሁለት ዓመት በውክልና ተጠበቆ እንደሚቆይ የሚገልጽ አንቀጽ ቢኖርም እሱን በመጻረር በያዘው ደመወዝ ከማኔጅመንት አባልነት በሚያርቅ የስራ ክፍል እንዲመደብ ተደረገ፡፡

ሁሉም እንዲህ ሆኖ አለፈና ሁላችንም ፍርዱን ለፈጣሪ ሰጥተን ስራ ጀምርን፡፡

በተመደብኩበት የስራ ክፍል ስራዬን እየሰራሁ በነበረበት ወቅት በሌላ ክፍል የደረጃ እደገት ይወጣል እኔም እንደ ተቋሙ ሰራተኛነቴ ለስራ ቦታው የሚመጥን የስራ ልምድና የትምህርት ዝግጅት እስካለኝ ድረስ የመወዳደር መብቴን ተጠቀሜ ተመዘገብሁ፡፡

ለደረጃ እድገቱ ብቁ መሆናችን ተረጋግጦ ለፈተና የተዘጋጀን እኔና ሁለት የስራ ባልደረቦቼ የተዘጋጀውን የጽሑፍ ፈተና የምንፈተንበት ቀንና ሰዓት ደርሶ ወደ ፈተና አዳራሽ ገባን፡፡

የፈተናው ጥያቄ ተሰጥቶ ፈተናውን ለመስራት እየተዘጋጀሁ ባለሁበት ቅጥበት ሁለቱ የደረጃ እድገት ተወዳዳሪ ባልደረቦቼ ፈተናው የተዘጋጀው ስራውን በምንሰራበት የአማርኛ ቋንቋ ባለመሆኑ አንፈተንም ብለው የፈተና አዳራሹን ለቀው ወጡ፡፡

በወቅቱ ፈተናውን ፈታኝ የነበሩት የሰው ሃብት ዳይሬክተሩ እና የሰው ሃብት አስተዳደር ባለሙያ ፈተናውን መፈተን ትችላለህ ስላሉኝ የደረጃ እድገት ፈተናውን በበቼኝነት ተፈተንሁ፡፡ የፈተና ውጤቴንና የደረጃ እድገቱን እየጠበቅሁ በነበረበት ወቅት ቂም በቀልን የእለት ከእለት የስራቸው አካል ያደረጉት ዋና ዳይሬክተሩ የተፈተንኩት ፈተና እንዲሰረዝ ያደርጋሉ፡፡

ሁሌም ለምን እና እንዴት ብዬ የመጠየቅን ልምድ አዳብሪያለሁና በወቅቱ የነበሩትን የተቋሙን የሰው ሃብት አስተዳደር ዳይሬክተር ይሄ ለምንና እንዴት በማለት ስጠይቅ ፈተናው ይታረምና ፈተናውን ካለፈ ህጋዊ ሆኖ የተፈተነው እሱ በመሆኑ የደረጃ እድገቱ ሊሰጠው ይገባል በሚል መርህና አሰራርን ተከትለው ጉንጭ አልፋ ክርክር ቢያደርጉም ዋና ዳይርክተሩ አሻፈረኝ ብለው እንዲሰረዝ አቅጣጫ መስጠታቸውን አረጋገጡልኝ፡፡

እኔም በወቅቱ መብቴን ማስከበር ስለነበረብኝ ጉዳዩን እስከ ህዝብ ተወካዮች ምክር ቤት ወሰድኩት እሳቸውም ተቀጣሪ ጠበቃቸውንና በወቅቱ የነበረውን የሲቪል ሰርቪስ ሚኒስቴር ሰዎችን አማከሩ ከዚያም ጉዳዩ እንደማያስኬዳቸው ተነገራቸው፡፡

ምንም አማራጭ ያልነበራቸው ዋና ዳይሬክተሩ በዘርፉ ልምድ ባላቸው ምሁራን ተዘጋጅቶ የነበረውና ለደረጃ እድገቱ ተፈትኘው የነበረው ፈተና እንዲታረም ተደረገና ፈተናውን ማለፍ በመቻሌ የደረጃ እድገቱ በእሳቸው ፊርማ ተረጋግጦ ተሰጠኝና አዲሱን ስራዬን መስራት ጀመርሁ፡፡

እኔም የስራ መደቡ የሚሰጠውን ሙሉ የስራ ነጻነት በእሳቸው ተዕዛዝ ተከልክዬ እሳቸውም በየመድረኩ "ማንም ፈተና ተፈትኖ ስላለፈ ምክትል ዋና አዘጋጅ ነኝ ማለት አይችልም የሚል የሞራልና የማሸማቀቅ የተለመደ እና ለመስማት የሚቀፈውን ስድባቸውን አጠናክረው ቀጠሉ፡፡

በዚሁ ስራ መደቤ ደርቤ እንድሰራ በደብዳቤ ተሰጠኝን አንድ ክልል ማስተባበር ስራ ኃላፊነት ህጋዊ ባልሆነ አግባብ የተቋሙን የክልል በማቅር በማፍረስ የተቋሙ አሰራር ባይፈቅደው ሁኔታ የልብ ወዳጃቸውንና የጥቅም አጋራቸውን ወደ አዲስ አበባ ዋናው መስሪያ ቤት እንዲመጣ በማድረግ የእኔን ቦታ በህገ ወጥ መንገድ ነጥቀው ለመስጠት ጥረት አደረጉ እኔም እስከ መጨረሻው ሞገትኋቸው እሳቸውም ጉዳዩ ረጅም እርቀት እንደማስኬዳቸው ሲያውቁ ሰይፋቸውን ወደ አፎቱ መለሱ፡፡ ይሄም ታለፈ፡፡

በዚሁ ከትምህርት በኋላ የአንድ ዓመት የተቋሙ ቆይታዬ በመልካም አስተዳደር ችግር የተማረረው የስራ ባልደረባዬና በአዲስ አበባ ዩኒቨርስቲ የ2ኛ ዲግሪ የሁለት ዓመት የትምህርት ቆይታ ጓደኛዬ ተቋሙን እየወደደውም ቢሆን ሰላምን ፍለጋ ለመልቀቅ የወስናል፡፡

ከዚያም የኢትዮጵያ ብሮድካስቲንግ ኮርፖሬሽን ያወጣውን ክፍት የስራ መደብ መነሻ አድርጎ የተወዳደረውና የተሰጠውን የጽሑፍና የቃል ፈተና በጥሩ ውጤት ማለፉን ተከትሎ እየቸገረውም ቢሆን ለትምህርቱ በገባው ውል መሰረት መክፈል የሚገባውን 80 ሺህ ያህል ብር ከፍሎ ለመሄድ የወስናል፡፡ ከባድ ውሳኔና ዋነኛ የመልካም አስተዳደር ብሶት መገለጫ፡፡

ህጋዊ አስራሩ በሚያዝዘው መሰረት የአንድ ወር ጊዜ የቅድመ ማስጠንቀቂያ ጊዜ በመስጠት ጉዳዩን እንዲጨርሱለት ዋና ዳይሬክተሩን ጨምሮ በየደረጃው ያሉ የስራ ኃላፊዎችን በአካል በማግኘትም፣ በጽሑፍ አሳሰበ፡፡

ሎሌ ሁሌም ለጌታው ከማደር ውጭ ምንም አማራጭ የለውም እና ችግር የለም ሲሉ የነበሩ የስራ ኃላፊዎች ሁሉ የዋና ዳይሬክተሩን የበቀል በትር ወደ ማሳረፍ ገቡ፡፡ ያለምንም ህጋዊ መነሻ የአንድ ወር ጊዜው በመጠናቀቂያው ሰዓት መክፈል የሌለበትን 180 ሺህ ያህል ብር እንዲከፍል በደብዳቤ አሳወቁት፡፡

በዚህም ምክንያት የስራ ባልደረባችን ከቦታ ቦታ ተንቀሳቅሶ የመስራት መብቱ ተገድቦ የቁም እስረኛ እንዲሆን ተፈረደበት፡፡ በወቅቱ እኔን ጨምሮ በጉዳዩ ያላዘነ ሰራተኛ አልነበረም፡፡

ይሄ እንግዲህ በሁለት ዓመታት አዲስ አበባ የዩኒቨርስቲ ቆይታዬ እና ትምህርቴን አጠናቀቄ በተቋም በነበረኝ የአንድ ዓመታት ያህል የታዘብኩት በተቋሙ ዋና ዳይሬክተር እና የጥፋት ተባባሪ ግብረ አበሮቻቸው እኔን ጨምሮ በሰራተኛውን በተቋሙ ከሚደርሱ ግፍና በደሎች መካከል በጣም ትንሹ ነው፡፡

ታዲያ በእነዚህ እና በአመታት መሰል የትግል ጉዳዮች ቂም የቋጠሩት የኢዜአ ዋና ዳይሬክተር(አቶ በቀለ ሙለታ ቶላ) ተቋሙንና ሰራተውን እንዲሁም የኢትዮጵያን ህዝብ እንዲገለግሉበት የተሰጣቸውን ስልጣን ለግል ቂምና በቀላቸው መወጫ በመጠቀም ያለምንም በቂ ምክንያት የመልካም አስተዳደር ችግሮችን ስለታገልኩ ብቻ የማይገናኝ ነገር በማገናኘት የተሰጣቸውን የመንግስት የስራ ሃላፊነትን ያላግባብ በመጠቀም በደብዳቤ ከሐምሌ 4 ቀን 2011 ዓ.ም ጀምሮ ከደመወዝና ከስራ አግደውኛል፡፡ የፍትህ ያለህ ይሏችኋል ይህን ጊዜ ነው፡፡

በቀጣይ ባለፉት ስድስት ዓመታት በዋና ዳይሬክተሩና በጥፋት ተባባሪዎቻቸው በተቋሙና በሰራተኛው የተፈጸሙ በደሎች፣የመልካም አስተዳደርና ብልሹ አሰራሮች እንዲሁም መሰል ጉዳዮችን በሜዝ እመለሳለሁ፡፡

ሰላም

 

Back to Front Page